जनकपुर । विश्वभरका हिन्दूहरूको बहुप्रतिक्षित राम मन्दिर प्राण प्रतिष्ठा सोमबार हुदैँछ । भारतको अयोध्यामा २२ जनवरी, २०२४ अर्थात माघ ८ गते दिउसो १२ः२० बजेको समयमा हुने प्राण प्रतिष्ठा कार्यक्रममा विश्वभरीका हिन्दु धर्मालम्बीको उपस्थिति हुने भएको छ ।
नवनिर्मित राम मन्दिरको प्राण प्रतिष्ठाको अवसरमा सोमबार जनकपुरधामस्थित जानकी मन्दिरमा सवा लाख दीप बाल्ने कार्यक्रम तय भएको छ । भारतको अयोध्यामा हुने राम मन्दिरको प्राण प्रतिष्ठाका दिन एक लाख २५ हजार दीप बालिनुका साथै विशेष आरती गरिने जानकी मन्दिरका महन्थ रामतपेश्वर दासले बताएका छन् । महन्थ दासले सोमबार उत्सवको रूपमा मनाउन समेत जनकपुरवासीलाई आग्रह गरेका छन् ।
दासले राम मन्दिरको उदघाटनको दिन दुवै मुलुकका लागि विशेष भएकाले दीप बाल्न तथा उत्सवमा उपस्थित हुन उहाँले सबैलाई आग्रह गरेका छन् । राम मन्दिरको प्राण प्रतिष्ठाका लागि जानकी मन्दिरको तर्फबाट चाँदीका धनुष वाण लगायत सुनचाँदीका विभिन्न गरगहना, लत्ताकपडा तथा फलफूल लगायत तीन हजार बढी कोसेली अयोध्या पठाइसकिएको छ ।
अयोध्याको राम मन्दिरबाट निम्तो आएपछि मन्दिरको प्राण प्रतिष्ठामा सहभागी हुन जानकी मन्दिरका महन्थ रामतपेश्वर दास र मन्दिरका उत्तराधिकारी रामरोशन दास बिहीबार अयोध्या पुगेका छन् । मन्दिर महन्थ र उत्तराधिकारी बाहेक मधेश प्रदेशमा राम मन्दिरको तर्फबाट कसैलाई पनि निम्तो नआएको बताइएको छ ।
माघ ८ गतेलाई सार्वजनिक बिदा दिन माग गर्दै जानकी मन्दिरका उत्तराधिकारी रामरोशन दासले मधेश प्रदेशका मुख्यमन्त्री सरोजकुमार यादवले ज्ञापनपत्र समेत बुझाएका थिए । उक्त ज्ञापनपत्रमाथि अहिलेसम्म कुनै निर्णय नभएको मुख्यमन्त्रीको कार्यालयले जानकारी दिएको छ ।
यसैगरी, अयोध्यामा नवनिर्मित भगवान् राम मन्दिरको प्राण प्रतिष्ठालाई लिएर मधेश प्रदेशका अधिकांश मठमन्दिर रङ्गरोगन गरेर सजाइनुका साथै जताततै राम अङ्कित झण्डा समेत झुण्ड्याइएको छ ।
सयौँ वर्ष लामो प्रतीक्षापछि भगवान् रामको मन्दिर निर्माण भएको खुसीयालीमा धनुषाको जनकपुरधाम उपमहानगरपालिका, क्षीरेश्वरनाथ, सहिदनगर, औरहीलगायत मधेश प्रदेशका दुई दर्जनभन्दा बढी स्थानीय तहले सोमबारका लागि सार्वजनिक बिदा दिएका छन् ।
Facebook Comments