काठमाडौं । नेपाल आइसिसी यू-१९ विश्वकप क्रिकेटको सुपर सिक्समा प्रवेश गरेको छ । दक्षिण अफ्रिकामा जारी यू-१९ विश्वकप खेलमा अफगानिस्तानलाई पराजित गर्दै नेपाल सुपर सिक्समा प्रवेश गरेको हो । १४६ रनको लक्ष्य पछ्याएको नेपालले ३२ बल बाँकी हुँदा १४९ रन बनाउँदै ४४.४ ओभरमा अफगानस्थानमाथि १ विकेटको जित निकालेको हो ।

नेपालको जितका लागि कप्तान देव खनालले अर्धशतक महत्त्वपूर्ण बनेको थियो । अफगानिस्तानले दिएको १४६ रनको लक्ष्य पछ्याउने क्रममा कप्तान खनालले ७३ बलमा सात चौकासहित अर्धशतक बनाएका थिए । ८९ बलको सामना गर्दै कप्तान खनालले कुल ५८ रन जोड्न सफल भएका थिए ।

यसैगरी, नेपालका लागि दिपक बोहोराले ४२ बलमा २७ रन, सुवास भण्डारीले २९ बलमा नटआउट ९ रन जोड्दै नेपाललाई जित दिलाउन योगदान गरेका थिए । जितका क्रममा आकाश त्रिपाठीले १६ र अर्जुन कुमालले १० रन जोडेका थिए । अन्य ब्याट्सम्यानले भने दोहोरो अंक जोड्न सकेनन्। दिपक डुम्रे ५, दीपेश कँडेल ४, विपिन रावलले २ रन बनाउँदा गुलसन झा र आकाश चन्द एकएक रनमै आउट भएका थिए ।

समूह 'डी'मा रहेको र यसअघि लगातार दुई खेलमा पराजित नेपाल शुक्रबार दक्षिण अफ्रिकाको इष्ट लन्डनस्थित बफेलो पार्क मैदानमा टस हारेर बलिङको निम्तो पाएको नेपालले ४०.१ ओभरमा १० विकेट लिँदै अफगानिस्तानलाई १४५ रनमा समेटेको थियो । अन्तिम खेलमा अफगानिस्तानलाई स्तब्ध पार्दै सुपर सिक्सको यात्रा तय गर्न सफल भएको हो ।

शुक्रबारको खेलमा अफगानिस्तानलाई मध्यम स्कोरमा समेट्न नेपालका लागि आकाश चन्दले सर्वाधिक पाँच विकेट लिएका थिए । दीपेश कँडेलले दुई विकेट लिए भने गुलसन झा, तिलक भण्डारी र सुवास भण्डारीले एक-एक विकेट लिएका छन् । समूह 'डी'बाट नेपालसहित न्युजिल्याण्ड र पाकिस्तान सुपर सिक्समा प्रवेश गरेका छन् ।

यसअघि नेपाल पहिलो खेलमा न्युजिल्यान्डसँग ६४ रनले पराजित भएको थियो भने दोस्रो खेलमा पाकिस्तानसँग पाँच विकेटको हार बेहोरेको थियो ।