काठमाडौं । नेपाली राष्ट्रिय क्रिकेट टिमका प्रमुख खेलाडी दीपेन्द्रसिंह ऐरी टी-२० क्रिकेटको अलराउन्डरतर्फ विश्वकै छैटौँ वरीयतामा उक्लिएका छन् ।

अन्तर्राष्ट्रिय क्रिकेट काउन्सिल (आइसिसी) ले सार्वजनिक गरेको वरीयतामा तीन स्थान सुधार गर्दै ऐरी छैटौँ स्थानमा पुग्नु सफल भएका हुन् । ऐरी भारतका अलराउन्डर हार्दिक पाण्डेय, इंग्ल्याण्डका लियाम लिभिङस्टोन र मोइन अलीलाई पछि पार्दै छैटौँ स्थानमा उक्लिएका हुन् ।

क्रिकेट इतिहाँसमा यो नेपाली खेलाडी पुगेको उच्च वरियता हो । ऐरी यसअघि ९ औँ स्थानमा थिए । जारी विश्वकपमा अलराउन्डर ऐरीले तीन खेलमा ६ विकेट लिएका उनले ब्याटिङतर्फ २६ रन मात्र बनाउन सफल भएका थिए ।

अलराउन्ड सूचीमा अस्ट्रेलियाका मार्कस स्टोइनिस शीर्ष स्थानमा छन् भने श्रीलङ्काका वानिन्दु हसरंगा दोस्रो र बङ्गलादेशका सकिब अल हसन तेस्रो स्थानमा छन् । चौथो स्थानमा जिम्बाबेका सिकन्दर रजा रहेका छन् ।