काठमाडौं । नेपाल प्रहरीको केन्द्रीय अनुसन्धान ब्युरो (सीआईबी)ले तपस्वी भनिएका रामबहादुर बम्जनलाई सार्वजनिक गरेकाे छ । २४ पुष मंगलबार हात्तिगौँडाबाट पक्राउ परेका बम्जनलाई सीआईबीले बुधबार पत्रकार सम्मेलन गरेर सार्वजनिक गरेको हो ।

बम्जनमाथि बाल यौन दुराचार,बलात्कार लगायत ४ अनुयायी बेपत्ता पारिएको आरोप छ। विभिन्न मितिमा बम्जनद्वारा संचालित आश्रमबाट हराएको उजुरी तथा बाल यौन दुराचारलगायत आरोपमा पक्राउ पुर्जी जारि भएसंगै बम्जनलाई खोजतलास तथा पक्राउ गर्न सीआईबीले 'अप्रेसन ब्लु' चलाएको थियो ।

बम्जनको पक्राउ पछि सीआईबीसहित प्रहरीको टोलीले बुढानीलकण्ठको हात्तीगौँडास्थित बम्जन बसेको घर खानतलास गर्दा १७ देशका मुद्रा सहित तीन करोड ३४ लाख ३७ हजार ९०६ रुपैयाँ नगद लगाएत विभिन्न वस्तुहरु बरामद गरेको छ ।

पत्रकार सम्मेलनमा प्रहरीले बम्जनको घरबाट तीन करोड ३४ लाख हाराहारीको नगद सहित १ टोयोटा हाइलक्स गाडी, १४ वटा मोबाइल, २ ल्यापटप, र २० वटा पेनड्राइभ लगायत मेमोरी कार्ड, भोइस रेकर्डर तथा विभिन्न ब्राण्डका २ पाङ्ग्रे सवारी साधनहरुपनि बरामद भएको जनाएको छ।

पछिल्लो समय सिन्धुलीको आश्रममा बस्ने गरेका बम्जन अदालतबाट पक्राउ पुर्जी जारि भएको थाहापाए लगत्तै सम्पर्क बिहिन बनेका बम्जन प्रहरीको फरार सूचीमा रहेका थिए । थप अनुसन्धान तथा कानुनी प्रक्रिया सम्पादनाकालागी सीआईबीले बम्जनलाई उनीविरुद्ध उजुरी परेको सर्लाही जिल्ला पठाउने समेत जनाएको छ ।