जनकपुरधाम । बाराका शिक्षक ब्रम्हदेव पासवान पहिलाकै विद्यालयमा पढाउन थालेका छन् । बारामा अवस्थित जीतपुर उपमहानगरपालिकाले उनलाई पहिलाकै विद्यालयमा पढाउने व्यवस्था मिलाएको हो ।

सिमराको नेपाल राष्ट्रिय माविमा अध्यापन गराउँदै आएका पासवान प्रावि तहका शिक्षक हुन् । उनलाई गत १८ भदौमा उपमहानगरपालिकाको शिक्षा समितिले दरबन्दी मिलान भन्दै हरपुरको नेपाल राष्ट्रिय माविमा सरुवा गरेको थियो । तर सरुवा गरिएको नयाँ विद्यालयले हाजिर गर्न नदिएपछि उनी समस्यामा परेका थिए ।

पछिल्लो समयमा उनको विषयलाई लियर सामाजिक संजाल समेत आवाज उठाउन भन्दै दवाब बढेको थियो । असोज ९ गते उनले उपमहानगरपालिका कार्यालयमा गुनासो लिएर पुगेका थिए । सरुवा भएर गएको विद्यालयले हाजिर गर्न नदिएपछि समस्या लिएर उपमहानगरपालिका कार्यालय पुगेका उनलाई उपमहानगरपालिकामै हाजिर गर्न लगाइएको थियो ।

उपमहानगरपालिका उपप्रमुख भोलाप्रसाद अधिकारीका अनुशार पासवानलाई व्यवस्थापन समिति र अभिभावकको अनुरोधमा पुरानै विद्यालयमा फर्काइएको थियो। पढाइमा तीक्ष्ण शिक्षक पासवान सिमराकै नेपाल राष्ट्रिय माविबाट एसएलसी उतीर्ण गरेका हुन् ।

पासपानले २०३९ सालदेखि सिमराको नेपाल राष्ट्रिय माविमा पढाउँदै आएका थिए । प्राथमिक द्धितीय श्रेणीका शिक्षक पासवान ०४८ सालमा स्थायी भएका थिए । हाल ५८ वर्ष पुगेका उनको सेवा अवधि जम्मा २ वर्ष छ ।

दिनभरि पालिकामा गएर बस्नुपरेपछि राजीनामा दिने सोँच बनाइरहेकै बेला साविकको विद्यालयमा काम गर्न पाउने भएपछि खुशी लागेको शिक्षक पासवानले बताए ।

'म शिक्षक हो । पालिका गएर हाजिर गरेर दिनभर बस्नको लागि मैले तलब पाएको होइन । त्यसैले अब म फोकटको तलब खान्न भनेर राजीनामा दिने सोँचमा थिएँ । अब दुई वर्ष शिक्षण गर्छु', उनले भने ।

सिमराको नेपाल राष्ट्रिय माविका प्रधानाध्यापक शंकर आचार्यले उपमहानगरपालिकाको पत्र आएकाले शिक्षक पासवानले विद्यालयमा हाजिर गर्न थालेको बताए ।