काठमाडौं । प्रधानमन्त्री पुष्पकमल दाहाल प्रचण्ड स्वदेश फर्किएका छन् । युगान्डामा आयोजित असंलग्न राष्ट्रहरूको आन्दोलनको उन्नाइसौँ शिखर सम्मेलनमा सहभागी भएर प्रचण्ड आज विहान स्वदेश फर्केका हुन ।
युगान्डाबाट उनी नेपाली समयानुसार आइतबार बिहान २ः४५ बजे कतारको दोहा अवतरण गरेका प्रधानमन्त्री 'प्रचण्ड' बिहान ९:३० बजे त्रिभुवन अन्तराष्ट्रिय बिमानस्थलमा अबतरण गरेका हुन ।
सो सम्मेलनमा भाग लिन प्रधानमन्त्री प्रचण्ड गत बुधबार युगान्डाको राजधानी कम्पला पुगेका थिए । स्वदेश फर्केलगत्तै प्रधानमन्त्रीले बक्तब्य जारी गरेका छन् । उक्त शिखर सम्मेलनको उच्चस्तरीय संवादको विषय 'Deepening Cooperation for Shared Global Affluence' राखिएको थियो ।
वक्तव्य मार्फत प्रचण्डले सम्मेलनमा अधिकम विकसित मुलुकहरुलाई विकास साझेदारहरुको बलियो साथ र सहयोगको आवश्यकता रहेको परिप्रेक्ष्यमा असंलग्न आन्दोलनले दिगो विकासका लक्ष्यहरू २०३०, पेरिस सम्झौता र अन्य अन्तर्राष्ट्रिय रुपमा सहमति भएका विकासका लक्ष्यहरु समयमै हासिल गरी विश्वका विकासोन्मुख मुलुकहरुको आर्थिक विकास र समृद्वि प्राप्त गर्नका लागि जोड दिनु पर्दछ भन्ने बिषय जोडदार रूपमा उठाएको प्रष्ट पारेका छन् ।
यसैगरी प्रचण्डले विश्व आर्थिक तथा वित्तीय संरचनालाई विकासोन्मुख मुलुकहरुको आर्थिक उन्नतिका लागि आवश्यक आर्थिक स्रोत सुनिश्चितता हुने गरी सुधार गरिनुपर्ने तथा संयुक्त राष्ट्रसँघ लगायत अन्तर्राष्ट्रिय व्यापार संरचना पनि विकासोन्मुख देशहरूको हित अनुकूल हुने गरी सुधार गर्न असंलग्न आन्दोलनले नेतृत्वदायी भूमिका निर्वाह गर्नुपर्नेमा आँफुले जोड दिएको समेत उल्लेख गरेका छन् ।
प्रचण्डले नेपालले सार्वभौम समानता, आपसी सद्भाव, आपसी लाभ र द्वन्द्वको शान्तिपूर्ण समाधानको आधारमा सन्तुलित र स्वतन्त्र परराष्ट्र नीति अवलम्वन गर्ने जनाउँदै असंलग्न आन्दोलनका सिद्धान्तहरु र यसका मूल्य तथा मान्यता हाम्रा लागि महत्वपूर्ण हुनुका साथै परराष्ट्र नीतिको एक आधारभूत सिद्वान्त रहेको र यसको परिपालनाले शान्ति, मेलमिलाप र समृद्ध विश्व प्राप्त गर्न मार्गनिर्देश गरिरहेको स्पष्ट पारेको बताएका छन् ।
यसैगरी विश्वका जीवित प्राणीहरुका लागि हिमाल अति महत्पूर्ण रहेको र पर्वतीय मुलुक नेपाल जलवायु परिवर्तनको चपेटामा परेको जनाउँदै हिमाल तथा पर्वतीय पारिस्थितिक प्रणाली र त्यहाँ बसोवास गर्ने मानव समुदायको संरक्षणका लागि नेपालले पैरवी गर्दै आएको बिषयलाई उक्त शिखर सम्मेलनमा उजागर गर्दै हिमालको आवाजलाई समर्थन गर्न समेत आँफुले आव्हान गरेको उल्लेख गरेका छन् ।
Facebook Comments