काठमाडौं । क्रिकेटर सन्दीप लामिछाने नाबालिग बलात्कारको मुद्दामा दोषी ठहर भएका छन् । न्यायाधीश शिशिर ढकालको इजलासले लामिछानेलाई दोषी ठहर गरेको जिल्ला अदालत काठमाडौंका सूचना अधिकारी चन्द्रप्रसाद पन्थीले जनाएका छन् ।
लामिछानेलाई कतिवर्ष जेल सजाय हुने भन्नेबारे निर्णय गर्न भने अदालतले अर्को पेशी तोकेको छ । १६ देखि १८ वर्षसम्मका बालिकालाई बलात्कार गरेको पुष्ठी भएमा १० देखि १२ वर्षसम्म कैद सजाय गर्ने कानुनी व्यवस्था छ।
२०७९ भदौ ५ गते गौशालास्थित एक होटलमा लगेर नाबालिग बालिका (गौशाला २६ - परिवर्तित नाम)को बलात्कार गरेको भन्दै सरकारी वकिलले मुद्दा दायर गरेको थियो ।
आइतबारदेखि निरन्तर बहस भइरहेको यस मुद्दामा आज सुनुवाई भएको हो । राष्ट्रिय क्रिकेट टिमका पूर्वकप्तानसमेत रहेका सन्दीपविरूद्ध गतवर्ष भदौ २१ गते एक किशोरीले जबरजस्ती करणी गरेको भन्दै गौशाला प्रहरी वृत्तमा जाहेरी दिएकी थिइन् ।
प्रहरीमा जाहेरी दर्ता हुँदा सन्दीप क्यारेबियन प्रिमियर लिग खेल्न वेस्ट इन्डिजमा रहेका थिए । जाहेरीपछि नेपाल क्रिकेट संघ(क्यान)ले सन्दीपलाई निलम्बन गरेको थियो।
वेस्ट इन्डिजमा रहेका लामिछाने नेपाल नफर्किएपछि प्रहरीको अनुरोधमा २०७९ असोज १० गते इन्टरपोलले डिफ्युजन नोटिस जारी गरेको थियो। इन्टरपोलमा नोटिस जारी भएपछि २० असोज २०७९मा नेपाल फर्किएका लामिछानेलाई विमानस्थलबाटै प्रहरीले नियन्त्रणमा लिएको थियो ।
मुद्दाको प्रारम्भिक सुनुवाइ गर्दै काठमाडौं जिल्ला अदालतले २०७९ कात्तिक १८ गते क्रिकेटर लामिछानेलाई पुर्पक्षका लागि थुनामा पठाउने आदेश गरेको थियो ।
जिल्ला अदालतको आदेशविरूद्ध सन्दीपले उच्चमा पुनरावेदन दिएका थिए । विदेश जान नपाउने, काठमाडौं उपत्यका छाड्न परे पनि प्रहरीलाई खबर गर्नुपर्ने, पीडित किशोरीसँग प्रत्यक्ष र अप्रत्यक्ष रूपमा सम्पर्क गर्न नपाउनेलगायत शर्त राखेर पुस १८ गते उच्चले लामिछानेलाई २० लाख धरौटीमा धरौटीमा रिहा गर्न आदेश दिएको थियो ।
उच्च अदालतको आदेशविरूद्ध क्रिकेट खेल्न विदेश जान पाउनुपर्ने मागसहित सन्दीपले फागुन १२ गते शुक्रबार सर्वोच्च अदालतमा रिट निवेदन दिएका थिए । यता, महान्यायाधिवक्ताको कार्यालयले सन्दीपलाई थुनामै राखेर मुद्दाको पुर्पक्ष गर्नुपर्ने माग राख्दै महान्यायाधिवक्तको कार्यालय सर्वोच्च पुगेका थिए ।
सन्दीप र महान्यायाधिवक्ताको कार्यालयले दिएको निवेदनबारे एकसाथ राखेर सुनुवाइ थालेको सर्वोच्चले फागुन १५ गते उच्च अदालत पाटनको आदेश केही उल्ट्याएर अर्को आदेश दियो । न्यायाधीश सपना मल्ल प्रधान र कुमार चुडालको इजलासले राष्ट्रिय खेलाडी भएको भन्दै सन्दीपलाई विदेश जाने अनुमति दिएको थियो ।
मुद्दामा प्रमाण जुटाउने तथा बालिकाको जन्म मितिसम्बन्धी कागज मगाउने लगायतका काममा जिल्ला अदालत काठमाडौंले विभिन्न चरणमा काम गरेको थियो । १० महिना अघिदेखि भने यो मुद्दा अन्तिम सुनुवाईका लागि पेशी चढ्न थालेको हो।
बलात्कार भएको हो कि होइन भन्ने विवाद भएको यो मुद्दामा यसअघि सुनुवाई गर्ने धेरैजसो न्यायाधीशले विभिन्न कारण देखाउंदै मुद्दा फैसलाको प्रक्रिया लम्ब्याएका थिए।
यस बीचमा विभिन्न समयमा अदालतले अरू अभियुक्तलाई नदिने सुविधा क्रिकेटर लामिछानेलाई उपलब्ध गराएको थियो । क्रिकेट खेल्न विदेश जाने समयमा पेशी तारेख नराख्न भन्दै उनले दिएको निवेदन उपर दुई महिनासम्म पेशी समेत नतोकीएको अवस्था छ। यस्ता किसिमका जटिल प्रवृत्तिका मुद्दामा कुनैपनि अदालतले बढीमा १५ दिन बाहेक अभियुक्तलाई सुविधा हुने गरि तारेखको समय लम्ब्याउन नपाइने व्यवस्था छ ।
Facebook Comments