काठमाडौं । जिल्ला अदालत काठमाडौंले बलात्कारको आरोपमा दोषी ठहर भएका क्रिकेटर सन्दीप लामिछानेलाई आठ वर्ष कैदसहित ३ लाख जरिवाना र पीडितलाई दुई लाख रुपियाँ क्षतिपूर्ति भराउनुपर्ने आदेश दिएको छ ।
यसैबीच, काठमाडौं जिल्ला अदालतबाट बलात्कार आरोपमा दोषी ठहरिएका क्रिकेटर सन्दीप लामिछाने उच्च अदालत जाने भएका छन् ।
क्रिकेटर लामिछानेको पक्षमा वकालत गर्दै आएका अधिवक्ता सरोजकृष्ण घिमिरेले न्यायका लागि उच्च अदालत जान लागिएको बताएका हुन् । अधिवक्ता घिमिरेले कुनै पनि आधार, कारण र प्रमाणहरुले लामिछाने दोषी नदेखिएको हुँदा उच्च अदालत जान लागेको समेत जनाएका छन् ।
लामिछानेलाई न्यूनतम सजाय तोक्नुपर्ने पक्षमा बुधबार काठमाडौं जिल्ला अदालतमा बहस गरेपछि अधिवक्ता घिमिरेले लामिछाने आफैँले पनि आफू निर्दोष रहेको दलिल पेश गरिरहेकाले न्यायको माग गर्दै उच्च अदालत जाने अधिकार आफूहरुलाई सुरक्षित रहेको तर्कसमेत गरेका छन् ।
जिल्ला अदालतको फैसलालाई आफूहरुले मान्नुपर्ने बाध्यता भएको जनाउँदै अधिवक्ता घिमिरेले सोसम्बन्धी कम सजायको माग गर्दै सजाय निर्धारण सम्बन्धी बहसमा आफूहरुले भाग लिएको समेत स्पष्ट पारेका छन् । क्रिकेटर लामिछानेको व्यक्तित्व, उनले खेल जगतमा पारेको प्रभाव, उनको सामाजिक दायित्व र उनका असल चरित्रलाई हेरेर न्यूनतम सजाय होस भन्ने आफूहरुको भनाइ रहेको समेत अधिवक्ता घिमिरेले बताएका छन् ।
लामिछानेलाई बलात्कारको मुद्दामा दोषी ठहर गर्ने फैसला गत पुस १३ गते काठमाडौं जिल्ला अदालतका न्यायाधीश शिशिरराज ढकालको इजलासले गरेको थियो ।
Facebook Comments